Rss Feed

تاااااج على راسى...







التاج ده من دندنة المدونين.. اول مرة تحصلى .. يلا خير .. يامهّوون يارب..


لو قالولك اختار عصر من عصور مصرعلشان تعيش فيه تختار اى عصر و فى عهد اى حاكم .. واشمعنى؟




اممممممممم.. بصوا انا كان نفسى اعيش فى عهد عمر بن الخطاب عارفة ان الموضوع كده ملوش دعوة بمصر .. بس

كان نفسى اشوف الحاكم اللى مكانش حد فى عهده جعان ولا عنده مظلمه
امممم بالنسبة لمصر بقى .. على رأى صلاح السعدنى فى مسرحية"باللو"كان نفسى أعيش فى مصر ايام ما مصر كانت
بجد والمصريين كانوا بجد .. ايام مالناس كانت بجد..ايام ما كانت الناس كلها بتطلع فى المظاهرات ,الرجاله الكبار قبل
الشباب المتحمس,مش زى دلوقتى كتير من المظاهرات بيطلع فيها اطفال المدارس اللى فاكرينها لعبة ومسرحية
وعايزين يعيشوا الدور.. وبيكتبوا منشورات فيها اكلشيهات هما مش فاهمين معناها اصلا.كان نفسى اعيش فى مصر
ايام ما كان الناس عندها قضية متجمعين حواليها وبيدافعوا عنها بجد..ايام ماكان فيه شارع.. وصحبة ولمة ..ايام ماكانت
الناس عندها وقت تهتم بغيرها بجد ,ويقعدوا ويتكلموا..على فكرة انا معشتش الجو ده قوى حتى زمان .. والكلام عنه
بيخلى عينى تدمع.
اول اولويه فى حياتك عيلتك ولا شغلك ولا اصحابك؟
هه؟؟احممم... بصوا العيلة مهما حصل بتشكل حاجة كبيرة قوى فى حياتنا..وليها اول تأثير علينا .. انما معروف عنى
ان اصحابى او "الصداقة" عندى لها مكانهة خاصة جدااااااااا
اكتر حاجه بتحبها فى رمضان؟
هه؟ مين اللى قال القطايف؟؟ لالالا ياجماعة فاهمنى غلط اكيد فى حاجة اهم من كده .. الخشااااااف.
بصراحة "التروايح "والاعتكاف .. تلك الجلسة الربانية والروحانية مع الله .. الفضفضة والبوح انت ونفسك والله .. يااااااااه.. واستمارة باسمك مفتوحة تضع فيها ماتشاء من رغبات الدنيا والآخرة .. لا شئ اثمن.
اوصف ليا اجمل فطار ممكن تفطره ؟
اليكم طبق اليوم.. ايه ياجماعة .. طب حضرتم ورقة وقلم عشان المقادير.. مين اللى عمل التاج ده؟؟!
اممم اول حاجة الخشاف طبعا .. اممم وممكن بانيه مع مكرونة بشاميل.. ايه ده مش مصدقة انى بكتب الكلام ده فى
البلوج بتاعى..الله يسامح اللى كان السبب
انت حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم عادل؟
مين اللى عمل التاج ده ياجماعه؟؟ّّّّ!!يلا ربنا يفك سجنه بقى..هههههه. بصراحة انا عمرى ماهقبل اكون حاكم,لأنها فتنة
كبيرة والواحد مش ناقص.اعمل ايه عشان اتأكد انى عادلة ..هشوف احوال الناس .. وهستشير المنصفين واولى
الأمر. ولازم طبعا ارجع للقرآن والسنة والخلفاء الراشدين اشوف كانوا بيعملوا ايه وانا فين منهم
اللى بيبوظ الحكام .. نفسهم؟ ولا الشعب؟ ولا الحاشيه المقربه؟
على فكرة اللى حاطط السؤال ده نيتة مش كويسة..ههههههه .كلهم بس الاكتر1-انفسهم "أعدى أعداء الاٍنسان نفسه
التى بين جنبيه".
2- الحاشية المقربة
مين أكتر اعلامي مصري بتحترمه؟
حمدى قنديل .. باٍستماته.
قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه؟
أخييييييييرا عرفت مين اللى عمل التاج.. عمر مصطفى أكيد.لا بصراحة مقريتوش . ان شاء الله هدور عليه. اشمعنى
بقى؟؟هه؟؟ هه؟
لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟
.
يارييييييت.. ارفعوا ايدكوا معايا ..ياااااااارب..مترجمة .. كاتبة مقال مثلا ..أدرس الأدب الانجليزى يارييييت.. اى حاجة تبع الفن, ممثلة أحيانا"احيانا لأ"حاجة تتعلق بالدعم النفسى وسماع
مشاكل الناس ,بعد ماخلص كلام عن مشاكلى واخلص كورس العلاج عند د/يحي الرخاوى طبعا ههههههههههههههههههه
ايه تانى بلد تتمنى تعيش فيها بعد مصر؟
لا خالص .انا كائن ضد الغربة.. بحب مصر وبموووت فيها .معنديش استعداد اسيبها خاااااااااااااالص..بحب كل تفاصيلها وملامح ناسها
بحب ابن البلد والجدعنة و..على فكرة واضح ان عمر مصطفى مشربش من نيلها ولا جرب يغنيلها .. ليه كده؟؟
اوصف ليا ترتيبات اجمل فرح ؟؟
اصحاب قاعدين يرتبوا يعملوا مفاجآت مميزة للعروسين....ورد وشموع على شكل قلوب على البست..عريس وعروسة
حاسين انهم لقوا بعض ومدركين ان اليوم تتويج لحبهم مش حفل تكريم فريق الكرة الخماسية.اهل فرحانين بولادهم .. وواخدين الموضوع ببساطة مش حفل عسكرى.كللللللللللل الأهل والأصحاب والأحباب موجودين ,متجمعين وفرحانين
الفرح يبدأ بأغنية خاصة بالعروسين "اغنية بتاعتهم هما"ويكونوا برضه مدركين ده .بلاش اتكلم عن نهاية الفرح
عشان دى بتبقى نكد وكلها عياط من غالبية الأفراد
بتراعي كلام الناس والقيل والقال؟ لو اه اولا قوللي ليه؟
بصراحة آه.. بصوا ساعات فى المواقف اللى ببقى عارفة ان الناس كلها هتبص عليا وهيكوّنوا فكرة ما عنى ,بطنش جداااااااااااا
ولا بيهمنى.. بس على الناحية التانية كراهية الناس او كلامهم السيئ عنى بيأثر فيا بعبط.. وبيأذينى قووى
صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟
مفيش موبايل؟؟امال هرن على صاحبتى ازاى عشان تنزل؟؟ومفيش كمبيوتر؟؟ امال هكتبلكم ازاى ابداعاتى؟؟ مفيش كاميرا ديجيتال؟؟امال هناكل ايه طيب؟؟لالالا الوضع كده صعب قوى.بس مدام فيها احصنة وحمام انا موافقة
المهم يبقى فيه صحبة وناس قريبة منك تفهمك وتحس بيك وتبقى معاك وقت ماتحتاج

السعاده هى؟
مبحبش الأسئلة اللى من النوع ده ومبحبش نفسى وانا بحاول اجاوب عليها..يمكن رضا ربنا سبحانة وتعالى.. ارتياح
واطمئنان.. طفل يحبك انت بالذات ويتعلق بيك وترتبط ضحكته بوجودك.. مش حاجة محددة تبقى هى السعادة بس ..اممم
ممكن تبقى اول اجابة.
عندك أمل ؟؟ أسبابك ؟
على راى عم متولى "حسبى الله ونعم الوكيل .. الأمل فى الله بس.
لما تحب تهرب من كل شئ بتروح فين؟
بنام للأسف.وغالبا لما بعوز اهرب منهم مبعرفش. بيجوا ورايا..اهئ اهئ
امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟
من فترة قريبة..حسيت انى كبرت قوى..مريت بمواقف كتييير , وشفت ناس كتير اتألمت وانجرحت .. اهتميت وطنشت .. حلمت ويأست جربت وفشلت .. تهت او بعدت .. مشيت فى سكك كتير .. مريت بتجارب وخبرات كتيير..
لما بتعمل عمل خيرى بيكون ايه هو دافعك الاول؟
المفروض بقى انى اقول اسعد الناس وارضى ربنا والجملة التقليدية المعادة"ارسم بسمة على وش الناس "والكلام ده؟
يعنى عشان تقولوا انى ملاك وكده يعنى؟؟النية هى الشئ الوحيد الذى لا يطلع عليه احد الا الله , لا ملك يكتبه ولا شيطان يفسده.
بتشرب سجاير؟ لو الاجابه اه ايه شعورك لو شفت ست بتشرب سجاير؟ وليه ؟
لا الحمد لله . انا ليا فى المخدرات بس.. ميييييييين اللى عمل التاج ده؟؟بتقرف وبشمئز .ليه ايه سيادتك؟؟يعنى لو مش عشان ان السجاير حرام
ولا عشان انها مؤذية ليا اكتر مما تكون مؤذية ليهم .. يبقى عشان هى مش جدعنة ولا برستيج ان الست تشرب سجاير ..ده ضد الكود النسائى تماما.
تعرف ايدك اليمين من الشمال ازاي؟
على فكرة دى كانت مشكلة عندى بجد .. ولا زالت بس احسن من الاول شوية ..بعرف ازاى؟؟ لا ده سر شويبس
ايه اكتر آله موسيقية بتحبها؟
رغم انى الحمد لله معدتش بسمع موسيقى.. لكن الآلات دى لها وقع خاص جدااا عليا "العود والقانون-------بيصحوا الأصالة جوايا
البيانو بيداعب قلبى........والاكسليفون بقى .. رقة الطفولة..
فى رأيك ليه الذوق والنخوة اتعدموا..؟؟
قول انت بقىىىى!!!!!اعتقد بسبب طغيان الحياة المادية والعملية وانحسار موجة الود والعلاقات الانسانية ,اللى مبقتش فى حسبان الناس..وبحيي دندنة جدااا على ردها على السؤال ده.
ايه الحاجة اللى لو حصلتلك تبقى سعيد قوى؟؟
ان ربنا يبقى راضى عليا والرسول كمان"صلى الله عليه وسلم"ان والدتى ووالدى يبقوا راضيين عنى..انى اقابله...
انى مخسرش اصحابى .. والاقى نفسى وانجح
تختار يبقى عندك...ارض زراعيه ولا اجنس عربيات و لا كام عماره و لا فلوس فى البنك؟؟؟؟
أجنس عربيات
البحر ولا النيل؟
البحر طبعا
مركب ولا طيارة؟
مركب طبعا.. احنا مش قولنا بحر..!
مجنون ولا عاقل؟؟
اللى هومين؟؟ههههه كده شوية وكده شوية
تقرا كتاب ولا تتفرج على فيلم؟
أتفرج على فيلم .. بس القراية دى موضوع تانى برضه
******************************************
يااااه كل ده تاج!! شكرا يادندون وكل تاج وانتى طيبة...
وقولتلك انا مش موونى لأ بالانجليزى و دبل اوو..كده
هههههههههههMoony