يامصـــــــــــر...!!!!!

مبروك لمصر.. مبروك لكل الناس اللى فرحت..ولله الف حمد وشكر انه قدّر للناس دى انها تفرح كده..

بس انا زى ما اكون عايزة اعمل استقراء على قدى كده للى شوفته وللى حصل على ظلال مبارة مصر والجزائر..

ايه ده ياجماعة .. انا طبعا سرت قشعريرة فى جسدى عند بدأ المباراة ومقدرتش - رغم عدم إهتمامى بالكورة- انى اغير القناة عن الماتش ودبت قشعريرة فى كيانى كله وانا بشوف المنتخب والعلم..بس عايزة اقول حاجة....

شوفتوا اللعيبة كانوا ماسكين فى بعض ازاى قبل بدء المبارة؟؟ شوفتوا ايدهم لّفة ازاى حوالين بعض؟ شوفتوا قد ايه الناس كلها كانوا متوجهين لربنا عشان نفوز؟؟شوفتوا الكاميرا وهى بتلف على اللعيبة واحد واحد وعلى جمال مبارك واللى كانوا معاه وكلهم بيتمتموا بالأدعية وآيات القرآن؟؟؟!!!!

رغم الفوز اللى انا طايرة بيه زيكوا كلكم بس ليه مشوفناش الروح دى فى اىىىىىى حدث تانى غير فى "لعبة" حتى ولو كانت على مستوى قومى؟؟!!!

ليه انطلقت الفتاوى والبرامج كلها تحذر الناس من التجمع فى صلاة التراويح بدعوى الخوف من انتشار وباء انفلونزا الخنازير.

وبعدها تنطلق فتاوى عدة من جهات متعددة والمفكرين والبرامج يحذروا الناس من الحج السنة دى واللى هو يعنى عايزين يقولولهم محبكتش التقوى السنة دى واستنوا اما نشوف الوباء ده هيرسى على ايه،ومشوفناش التحذيرات والمنع ده من حضور المبارة النهاردة.

ليه ياجماعة الناس مترددتش انها تحضر مبارة مصر والجزائر واترددت الف مرة انها تروح تحج وترجع من ذنوبها كيوم ولدتهم امهاتهم، لدرجة ان فيه ناس تراجعت عن الفكرة بالفعل خوفا من الإصابة..

ياترى يقين وحماس الناس اللى كانت فى الاستاد النهاردة والناس اللى جت من الجزائر مخصوص تشجع منتخب بلدها فى بلد تانية فى لعبة كان اقوى من يقين وحماس وشوق الناس لله ولبيته الحرام وللمغفرة؟؟

عايزة اكلمكم عن دموعى ورعشة جسمى ساعة ما صحيت على الهدف التانى لعماد متعب وبحة صوت المعلق من الفرح ...اقولكم ايه اقولكم انى للحظة تصالحت مع وشوش ظهرت ع الكاميرا فى التليفزيون انا بكنلها كره وغضب، تصالحت مع بسمة وشوشهم عشان خاطر عيون مصر..

اقولكم ايه؟؟ ازاى ممكن اوصفلكم شعورى ساعة ماخرج شباب منطقتى من القهوة اللى تحتنا وهما بيصرخوا من الفرحة وبيسجدو ا لله شاكرين..الشباب دول اللى كل معرفتى بيهم لما اصواتهم تعلى بالخناق واطلع ابص الاقيهم بيتخانقوا مع بعض لأى سبب كان، ونفس السيناريو بيتكرر كل مرة: زعيق وخناق والفاظ نابية جدا وفجأة واحد يروح ينادى لبقية الهجّامة وفجأة تلاقى كل واحد طلع من بنطلونه سيف واللى مطلع مطواة وستات تصوت..

النهاردة شفت الولاد دول وهما فرحانين وهما بيطبلوا ويهتفوا باسم مصر دموعى نزلت غصب عنى وصعبوا عليا قوى وصعب على اهل مصر كلهم الغلابة اللى مش طايلين حاجة ومحتاجين كل حاجة ونفسهم يفرحوا لأى حاجة، ومصر نفسها كمان صعبت عليا قوووووى...

شباب مصر كللللللهم اللى ملحقوش مصر اللى كانت بتدى ووعيوا على مصر اللى مش عارفة تديهم اى حاجة حتى اسمها لطخته حاجات كتير ,,مصر اللى مش عارفة توفر لهم شغلانة ولا مسكن ولا تيّسر لهم إنهم يتجوزوا..مش قادرة تلبى اقلللللل احتياجتهم وعشان كده بقى اسم مصر عندهم مرتبط بمشاعر سلبية ..."الانهزام واليأس والخبية وقلة الحيلة"ومكانش اسم مصر له طنين محبب فى نفوسهم..النهاردة يامصر كللللللل ولادك دول اللى مشافوش خيرك كانوا خارجين وسايببن اى حاجة فى الدنيا عشان يهتفوا باسمك ويحتفلوا على ارضك وتحت سماكى...!!! بجد حاجة تفرح..

مبروك لمصر..مبروك لكل حد فرح النهاردة من قلبه ونسى احواله شوية..يارب فرج كربة كل مسلم وكل انسان

يـــــارب نشوف روح الجماعة دى فى حاجة اكبر من كده..يارب نشوفها لحاجة فى مصلحة البلد والناس,, يارب زى ما قلوب الناس اتجمعت النهاردة كللللللللها تترجاك بالفوز لمصر تتجمع كلها بالسعى والدعاء والعمل للخير لمصر وللمسلمين كلهم..

يارب زى ماشفت الفرحة النهاردة فى عيون الناس كلها اشوفها بنصرة مصر والمسلمين فى كل شئ .. اشوفها فى تحقيق السلام على الأرض كلها.. اشوفها فى عيون اخواننا فى فلسطين والعراق وكشمير وافغانستان وكل مكان..

يارب اصلح حال مصر وسائر بلاد المسلمين واصلحنا لمصر وسائر الناس اجمعين..

يارب تعبنا من الفساد ومن الأوجاع ومن الذنوب ومن الهموم .. محتاجين نفرح كده ونفخر بنفسنا كده محتاجين العزة والنصر بس يارب تكون فى حاجة اكبر واهم من كده..